Di aprile di u 1969, publicava Marguerite Duras Détruire, dit-elle, u listessu annu adattava u testu per u cinema. Mette in scena, issu racontu fattu à pezzi, trè persunaghji chì a putenza di a brama i sottumette, in un albergu à l’arice di un boscu. Spessu inde l’opera di Duras à l’azzione li vene sustituita l’attesa, pare ch’elle fussinu e parolle tocche da una turpidezza strana è s’ellu si tratta di spiantu, hè quellu di l’ordine suciale quì. Invece di una psiculugia di l’individui, da traduce a forza impersunale chì travaglia, hè una geumetria di u spaziu à rimpiazzà la. Da un’attitudine à quill’altra spicca una sumiglia trà i sfarenti prutagunisti, in fatta fine hè a singularità di ognunu chì vene incausata. Hè cusì chì, Détruire, dit-elle, hè puntellata da una radicalità chì testimunieghja di a scustruzzione di u sugettu umanu, prucessu sputicu di una certa mudernità, chjamata tandu, post-strutturalisimu.

Ùn si tratta, cinquant’anni dopu, di turnà à ripiglià tal’è quale issu accostu. Nè mancu, puru arringuerscendu u titulu, di vultà à a putenza di l’autore/artista senza avè la interrugata prima. Di fatti, vole mette in risaltu Crià dicenu u bullore di a scena artistica corsa chì ci anu e donne una parte di primura, pigliendu in contu in u listessu tempu una pruspettiva identitaria nova. Si pò accorghje omu chì un trattu pare di esse cumunu à l’inseme di l’opere sposte, ch’è no ci arrisicheremu à chjamà un putere di metamorfosi. Pò esse rimarcatu, inde e fiure è i soni pruposti ci, un prucedimentu di trasfurmazione. Hè u segnu ch’ellu ùn hè mancu appena stantaratu u territoriu isulanu. Ci si sparghjenu sensibilità chì curanu è cherenu sperienze capace à cummove ci, à alterà ci è à fà ci capì chì u feminile di chì si tratta hè anzituttu a spressione di una rimessa in causa di e raprisentazione chì anu a suprana è chì, mai, volenu mutà.