Dicendu la à l’accorta, Barbara Carlotti anzituttu scrive è cumpone. Prima e canzone ch’ella canta (6 dischetti : Chansons ; Les Lys Brisés ; L’Idéal ; L’Amour L’argent Le vent ; Magnétique ; Corse, Ile d’amour), spettaculi dinù, emissione di radiu (Cosmic Fantaisie à nantu à France Inter) è ancu di televisione (Le Cabaret Insolite à nantu à France 3 Corsica), u filmu « Quatorze Ans » chì hè una cumedia musicale da ghjuvanotti chì Ecce Film hà pruduttu in u 2019. Creazione chì sò tanti isulotti accunciati à mezu à l’oceanu di u reale è, trà di elli, ci si corre una voce chì pare di acqua, à quandu linda à quandu torbida, acqua viva o meza cheta, ma ipnotica di sicura. Una voce chì, à le volte, s’intreccia à voce altre, in duetti cù Philippe Katerine, Dominique A, Bertrand Belin, Juliette Armanet, Izia, Bertrand Burgalat… Custellazione di anime surelle di a pop francese induv’ella splende Barbara Carlotti.