Oghje ch’è no campemu a sesta estinzione massiccia di e spezie, sceglie Zoo Cosmos di visticà l’animali interrughendu u nostru raportu cun elli chì, spessu, sò stati cunsiderati cum’è un’alterità chì ci tuccava à liberà si ne. Di pettu à issu prucessu di sterminiu iniziatu cù a mudernità è chì và precipitendu si, tornanu l’artisti à scurticà issa spiccanza trà « noi » è « elli » da pudè la cuntrastà. Venenu pruposti accosti plurali : da a cuntemplazione affascinosa di Anne-Charlotte Finel à l’empatia di Ben Thorp Brown finu à a viulenza muta ch’ella mette in scena Caroline Poggi. Hè a manera più adatta da traduce isse leie, strette è strinte, ch’è no avemu è mantenimu cun quelli chì li avemu toltu a so capacità di risponde, cum’ellu a ci insignava Jacques Derrida. Appuntu, hè da a banda di a parolla ch’elli si sò vultati Bertrand Dezoteux, Hoël Duret, Basim Magdy è Gernot Wieland. Si succedenu in e so opere u zitellescu, a malizia, l’allucinu, u pueticu è l’assurdu cunfruntendu si, in un muvimentu cuntinuu, à i limiti nostri innalzati da alluntanà quelli ch’è no chjamemu animali. Per via di quessa, a scelta fatta da Zoo Cosmos ci ramenta, cù Baptiste Morizot, ch’è no « simu un intrecciu di animalità mille chì ci arricchiscenu, cum’è l’altri animali di altronde, ma ci permette u nostru modu di campà culturale è tecnicu di accuncià le di varie manere. Di palisà u so carattere multiplice, di sprime le disignendu custellazione sempre nove. »

traduction : Association Pratiqua Lingua