Hè felice a Casa Conti – Ange Leccia di accoglie è di prupone vi una mostra di Anne-Charlotte Finel dopu à a so prima residenza. Issa artista videugraffa travaglia spessu cù un materiale legeru da permette li di chjappà scene urdinarie è à tempu strane. Diventanu, lumi è animali, i persunagi principali di e so sequenze chì guasi piglianu u versu di l’astrazzione è, ogni tantu, si avvianu ver’di u campu di a fintascenza. E cerve in vicinanza di una cità quant’è u luccichime di e nutaghjole sò tanti indizii di una forma distopica chì ùn si vole palisà. Firmendu si in agguattu, prupone Anne-Charlotte Finel un sguardu inchietu à nantu à u mondu, un sguardu fattu à palpiti chì agguanta u reale cum’è s’ellu si pudia tuccà, ma chì à avvinghje lu ùn ci si riesce. Mentre a so residenza in Corsica, si hè cuncentrata à nantu à un allevu di porchi ch’ella hà filmatu propriu da vicinu, mettendu in risaltu a forza di u detagliu, da incrucià à a so parte bestiale tratti di una umanità prufonda. Hè cusì ch’ella allarga u so bestiariu Anne-Charlotte Finel da testimunià di u cambiamentu di a nostra relazione cù l’animali, esseri capaci di sensibilità chì li simu liati stretti. Cù issa prova di esce di a pusizione antropocentrica chì hè nostra, ci invita l’artista à pensà un universu chì e so fruntiere sò di più lebbie è induv’elli si cunfondenu l’ordini – una chjama da ricusà e verità sulenne è cunsacrate chì ci venenu imposte.