Nata in u 1986, Anne-Charlotte Finel hà ottenutu u so diploma cù una menzione à a scola di e Belle Arte di Parigi in u 2010. Cum’è artista video, hà sceltu di travaglià à l’indrentu di una incritta immutevule : « E mio video e facciu di notte, à l’alburighjà, à l’abbrucà, via l’ora fatata ». Un tempu incertu è arcanu chì ogni cosa vene suspesa. Issa incritta hè geugrafica dinù, quella di a cità cunfinendu cù a campagna, un paisaghju transitoriu da intriccià à u sguardu è chì a so prisenza hè cuntinua in a pratica di l’artista. Cerca à creà « fiure alluntanendu si da una realità troppu cruda, troppu definita », fiure lente, oniriche guasi, à modu di un mutivu astrattu.

Hà ricevutu u Premiu Video di a Fundazione François Sommer in u 2015 è u Premiu di u Cunsigliu Dipartimentale di i Hauts-de-Seine rimessu mentre u Salone di Montrouge in u 2016. Hà prisentatu mostre persunale à a Galleria Edouard Manet (Gennevilliers), à a Galleria Jousse Entreprise (Parigi), inde l’Attelli Vortex (Dijon), à u Centru di arte Le Lait (Albi), à The Chimney (New York) è in cinque cità di Russia in partenariatu cù l’Istitutu francese di San Petruburgu. Hè statu integratu u so travagliu in mostre cullettive à u Palazzu di Tokyo o à a Sinagoga di Delme in Francia, è à livellu internaziunale (Messicu, Australia, Hong Kong, Italia, Alimagna, Giappone è Stati Uniti). Hè raprisentata da a galleria Jousse Entreprise in Parigi.